Берлин го притиска Загреб околу Црна Гора: Споровите би можеле да го блокираат пристапувањето во ЕУ

Германската влада го засили дипломатскиот притисок врз Хрватска за што поскоро решавање на билатералните спорови со Црна Гора – спорови што би можеле да го загрозат планот на Подгорица да стане членка на Европската унија до 2028 година.

Според „Еуроњуз“, повикувајќи се на четворица функционери запознаени со разговорите, Берлин побарал од Загреб да заземе конструктивен пристап кон решавањето на отворените прашања со Црна Гора, која во моментов е најнапредната земја-кандидат во процесот на пристапување кон ЕУ.

Германија неодамна понуди да посредува во преговорите меѓу двете земји, иако оваа иницијатива сè уште не е реализирана. Владата на канцеларот Фридрих Мерц сака да дејствува како посредник, стравувајќи дека нерешените билатерални спорови би можеле да го забават или загрозат процесот на проширување на ЕУ.

Претходно оваа недела, Хрватска изнесе листа од осум барања за кои сака да се најде решение пред Црна Гора да ги заврши преговорите за пристапување.

Во четвртокот, пред самитот на Европскиот совет во Брисел, хрватскиот премиер Андреј Пленковиќ изјави дека Загреб со години ги предупредува црногорските власти за овие нерешени прашања.

„Постојат прашања на кои со години им укажуваме на нашите црногорски соседи“, рече Пленковиќ.

Тој додаде дека во последните две години не е постигнат никаков напредок, нагласувајќи дека Хрватска била исклучително конструктивна во текот на преговорите за пристапување на Црна Гора. Во последните недели, Европската комисија се вклучи во разговорите меѓу Загреб и Подгорица, додека неколку земји-членки се обидуваат да спречат застој во процесот на проширување предизвикан од билатерални несогласувања.

Покрај Германија, дипломатски притисок врз Хрватска вршат и Франција и Луксембург. Франција сака да избегне дополнителни пречки за проширувањето, додека Луксембург го критикуваше користењето на процесот на пристапување за решавање на билатерални прашања.

Сепак, најголемиот притисок доаѓа од Берлин, кој има за цел да го одржи политичкиот моментум на проширувањето на Европската унија.

Споровите меѓу Хрватска и Црна Гора главно произлегуваат од наследството на војните во поранешна Југославија во текот на раните 1990-ти години, вклучувајќи имотни прашања, спорни граници и барања поврзани со воени злосторства. Каја Калас, високиот претставник на ЕУ за надворешни работи и безбедносна политика, исто така ја критикуваше можноста билатералните прашања да станат пречка за проширувањето, наведувајќи, на маргините на самитот на Европскиот совет, дека процесот на пристапување не смее да биде заложник на ваквите спорови.

Поддршка со ултиматум: Се множат хрватските барања пред влезот на Црна Гора во ЕУ – сега се осум