Алвата е традиционален десерт од ориентално потекло кој се подготвува со генерации на Балканот.
Иако е направена само од неколку состојки, нејзиниот богат вкус и специфична текстура ја прават омилен десерт со кафе или чај.
Главната состојка е таан, паста од сусам, која ѝ дава на оваа алва препознатлива арома и полн вкус.
Овој десерт е многу лесен за подготовка, а резултатот е мек и компактен десерт кој буквално се топи во устата.
Состојки:
-280 г шеќер
-100 мл вода
-340 г таан
Подготовка:
Истурете ја водата и шеќерот во мало тенџере, потоа загревајте на тивок оган додека шеќерот целосно не се раствори. Кога смесата ќе почне малку да врие, тргнете ја од шпоретот и оставете ја да се олади неколку минути.
Постепено мешајте го таанот во млакиот сируп. Мешајте додека не добиете густа и мазна смеса без грутки.
Префрлете ја подготвената маса во калап или сад обложен со хартија за печење и рамномерно распоредете ја.
По желба, можете да додадете ситно сечкани ф’стаци, бадеми или ореви за да добиете уште побогат вкус и поубава текстура.
Оставете ја алвата прво да се стегне на собна температура, а потоа префрлете ја во фрижидер неколку часа. Најдобро е да ја оставите да отстои преку ноќ за целосно да се стврдне.
Кога ќе се олади, извадете ја од калапот и исечете ја на помали коцки или плочки. Сервирајте со кафе или чај.
