300.000 деца злоупотребени во француските цркви: Папата ќе се сретне со жртвите за време на неговата посета во септември

Папата Лав XIV ќе се сретне со жртвите на злоупотреба од страна на свештеници за време на неговата четиридневна посета на Франција во септември. Ватикан го објави распоредот во петокот, кој вклучува посета на седиштето на УНЕСКО, состанок со француските бискупи во Лурд и меѓуверски собир во Мец, објави Еј-би-си њуз“.

Во посебна изјава, Ватикан потврди дека Папата ќе се сретне со неколку жртви на злоупотреба и истакна дека тие ќе учествуваат во подготовката на состанокот. Точното време и локација ќе бидат објавени подоцна.

Папата се сретна и со шест жртви за време на неодамнешната посета на Шпанија, каде што црковната хиерархија дури неодамна почна да се соочува со проблемот на злоупотреба и прикривање што го потценуваше со години. Во Франција, според извештајот од 2021 година, околу 330.000 деца биле сексуално злоупотребени од страна на црковен персонал за 70 години.

Папата минатиот месец ја потврди својата посветеност на борбата против злоупотребата во Црквата. Тој го назначи францускиот бискуп Тибо Верни да раководи со советодавната комисија на Ватикан за заштита на децата.

Патувањето во Франција од 25 до 28 септември, потврдено во мај, е четвртата странска посета на Папата оваа година. Тој го посети Монако во март, четири африкански земји во април и Шпанија и Канарските Острови во јуни. Ватикан оваа недела потврди дека тој ќе патува во Латинска Америка за прв пат како папа во ноември, посетувајќи ги Уругвај, Аргентина и Перу, каде што служеше повеќе од три децении.

Посетата на Франција ќе започне на 25 септември во Париз. Тој ќе се сретне со претседателот Емануел Макрон во Елисејската палата, пред да се обрати на владини претставници, граѓанското општество и дипломатскиот кор. Потоа ќе одржи говор во седиштето на УНЕСКО. Вечерта ќе води молитвена служба во катедралата Нотр Дам, а денот ќе заврши со молитвено бдение со млади луѓе на националниот стадион.

Вториот ден од неговата посета ќе биде посветен на социјалната инклузија и активното учество на верниците. Папата ќе го посети центарот за социјална поддршка и интеграција „Мезон Бахита“, а потоа ќе се сретне со синодалното собрание за вклучување на лаиците во црковните работи и со неодамна крстените католици.

Подоцна истиот ден, тој ќе отпатува во Лурд, едно од најважните католички места за поклонение. Таму, ќе се помоли во Пештерата на јавувањата и ќе се сретне со персоналот и пациентите во објектот „Акуеил Нотр-Дам“. Неговиот престој во Лурд ќе заврши со молитва и поворка со факели.

Неговата посета на Франција завршува во Мец, град во близина на границите со Луксембург и Германија. Таму, тој ќе учествува на меѓуверски состанок во центарот именуван по Роберт Шуман, францускиот државник и еден од основачите на европската интеграција. Шуман, католик, беше прогласен за „Почитуван слуга Божји“ во 2021 година, чекор во процесот на негова канонизација.

За разлика од неговиот претходник, покојниот папа Франциск, кој во голема мера ги избегнуваше големите европски христијански центри за време на неговиот 12-годишен понтификат, Лav се чини дека им посветува поголемо внимание на европските верници.