Градоначалникот на Општина Кавадарци, Митко Јанчев, вчера, заедно со директорот на ЈП „Комуналец“ и со претседателот на Советот на Општина Кавадарци, го промовираше новиот дигитален систем за управување со Зелениот пазар, со кој се воведуваат современи решенија што обезбедуваат целосна евиденција, побрза наплата и поголема транспарентност во работењето.
– Со новиот систем, секоја тезга е дигитално мапирана со свој бар-код, а контролата и наплатата се вршат директно на терен, преку современи мобилни уреди со фискални печатачи. На овој начин значително се зголемува ефикасноста, се намалува можноста за грешки и се создаваат еднакви услови за сите закупци. Дополнително, секоја контрола е фотодокументирана, што овозможува точна евиденција и дополнителна заштита од евентуални злоупотреби. Системот користи и современи алатки за анализа на податоците, кои ќе придонесат за подобро планирање и за понатамошен развој на Зелениот пазар – истакна Јанчев.
Градоначалникот додаде дека дигитализацијата е еден од приоритетите на локалната самоуправа и дека Општина Кавадарци ќе продолжи да инвестира во модерни, транспарентни и ефикасни решенија што ги подобруваат јавните услуги и го унапредуваат квалитетот на живот на граѓаните.
– Со оваа инвестиција, Кавадарци добива помодерен, поорганизиран и потранспарентен Зелен пазар, во интерес на сите граѓани – нагласи Јанчев.
