Со засадени 300 нови дрвца во „Рајски парк“ во скопско Лисиче, денеска започна, трета година по ред на реализацијата на големиот еко-проект „Пошумуваме заедно за позелено утре“ на ДМ дрогерие маркт. Дрогерискиот синџир овој проект го започна во 2022 година, а преку досегашните активности засади околу 60.000 нови садници. До крајот на оваа сезона на пошумување компанијата ќе достигне јубилеен број од 100.000 засадени дрвја.
Во позитивна атмосфера полна со ентузијазам, прекрасна дружба на учесници од сите генерации, уште еднаш беше потенцирана важноста на пошумувањето и заложбата за зачувување и обновување на зелените површини во земјава. Во акцијата беа вклучени вработени од компанијата, волонтери од повеќе здруженија, институционални партнери, како и медиуми и инфлуенсери кои ја покажаа својата екосвест и ја дадоа својата поддршка.
– Секое ново засадено дрвце нѐ носи чекор поблиску до нашата цел. Цврсто сме уверени дека нашите континуирани заложби, ентузијазмот и визијата ќе го дадат посакуваниот резултат – Позелено утре за сите нас. Посебно сме горди на сите наши колеги кои денеска, но и години наназад несебично го даваат својот придонес кон оваа цел, а нашата благодарност ја изразуваме и кон сите совесни граѓани, здруженија, институции и медиуми, кои нѐ поддржуваат во остварување на резултатите. Се надеваме дека со нашите акции ќе дадеме пример и ќе поттикнеме понатамошно ширење на грижата за нашата околина, бидејќи верувам дека сме свесни колку ни е тоа и повеќе од потребно – изјави Кристина Дуранска, менаџер за маркетинг и комуникации во Дм дрогерие маркт во Македонија.
За проектот „Пошумуваме заедно за позелено утре“, за оваа година компанијата одвои повеќе од 1.200.000 денари донација, во форма на набавка на садници и техничка опрема.
Активностите во рамките на овој проект оваа година ќе продолжат за само неколку денови со хортикултурно уредување на дворовите на ОУ „Славејко Арсов“ и детската градинка „Сончогледи“ во Штип, а на 24 ноември ќе се реализира уште едно масовно пошумување во близина на езерото „Младост“ во Велес, на површина што неодамна беше зафатена од пожар.
За време на садењето доброволно ќе учествуваат вработени од компанијата ДМ, но целта е во проектот да се приклучат и што повеќе еколошки свесни граѓани, институции и организации со кои заедно ќе се пошумат 18 хектари нови зелени површини. Во финалето на третата сезона целта е да се стигне до бројката на 100.000 засадени дрвја.
(С.Бл.)
