Општина Центар и оваа година обезбедува летно згрижување за децата до 10-годишна возраст, со цел да им излезе во пресрет на семејствата што во текот на распустот имаат потреба од дополнителна поддршка, поради работни обврски.
Пријавувањето почна вчера, а родителите треба да достават документација согласно со критериумите наведени во правилникот.
– Станува збор за програма за дневно згрижување деца од прво до трето одделение, која ќе се реализира во повеќе клонови на градинките „13 Ноември“, „Кочо Рацин“ и „Раде Јовчевски-Корчагин“. Во рамките на програмата, децата ќе престојуваат во безбедна и стимулативна средина, каде што преку едукативни работилници, креативни активности и содржини соодветни на возраста, ќе бидат вклучени во квалитетно исполнет летен распуст – соопштија од Општина Центар.
Градоначалникот на Општина Центар, Горан Герасимовски, истакна дека oваа мерка претставува значајна поддршка за семејствата во период кога не работат училиштата, а родителите имаат редовни работни обврски.
– Наш приоритет е децата да бидат згрижени во безбедна, квалитетна и исполнета средина во текот на летниот распуст – нагласи Герасимовски.
Општина Центар ги повикува заинтересираните родители навремено да аплицираат во градинките.
ИЗДВОЕНИ
ВМРО-ДПМНЕ прифаќа една изборна единица за да се донесе Изборниот законик
Верата не е пречка за спасување живот – дарувањето органи е благороден чин, но само со слободна волја
Квадратот сè понедостижен, за сопствен стан во Скопје треба да се работи и до 17 години
Нежната срна спасена, но со тешки последици сега живее на село, со мало јаре спасено од колење
