„Визер“ би можел да стационира авион во Охрид

Охридскиот аеродром би можел да добие свој стациониран авион на „Визер“, што би значело и нови авионски линии од градот. Најавата ја објави порталот EX-YU Aviation, повикувајќи се на изјава на вицепремиерот и министер за транспорт, Александар Николоски. Според најавата, авионот би бил постојано сместен во Охрид, а со тоа авиокомпанијата би можела поинаку да си ги организира летовите. Тоа, меѓу другото, би отворило простор за нови дестинации, повеќе фреквенции и полетувања во раните утрински часови.

Од „Визер“ засега немаат официјален коментар за можноста за база во Охрид.

Николоски, пак, неодамна изјави дека зголемениот број патници во земјава во голема мера е поврзан со новите линии и со поголемиот капацитет на авиокомпаниите. Тој посочи дека „Визер“ во моментов има седум авиони стационирани во Скопје, а се очекува еден да биде поставен и во Охрид.

Министерот уште во мај најави дека авиокомпанијата ја разгледува опцијата за отворање база на охридскиот аеродром, а нови дестинации се очекуваат и со зимскиот ред на летање.

„Визер“ не е нов играч во Охрид. Авиокомпанијата е присутна на аеродромот повеќе од десет години, односно од јуни 2015 година, кога почна со сезонските летови до Лондон Лутон. Само еден месец подоцна следуваше и целогодишната линија до Базел. Летовите веднаш се почувствуваа во бројките. Во првата година, „Визер“ превезе околу 60.000 патници од охридскиот аеродром, а вкупниот број патници на аеродромот порасна за 54 проценти, достигнувајќи тогаш рекордни 107.916 патници.