Трамп: Рокот за постигнување договор со Иран утре е конечен – предлогот за мир им е значаен, но не е доволно добар

Американскиот претседател Доналд Трамп денес изјави дека рокот од утре, до 20:00 часот источно време, што го постави за Иран да постигне мировен договор, е конечен.

Во говорот пред Белата куќа, Трамп рече дека иранскиот предлог за постигнување мир е значаен, но не е доволно добар, објави „Ројтерс“.

Порано денес, во одговор испратен до Пакистан, на предлогот на Соединетите Американски Држави за прекин на војната, Техеран ја отфрли можноста за прекин на огнот и ја нагласи потребата од „траен крај на војната, почитувајќи ги ставовите на Иран“.

Во одговорот од 10 точки се наведени низа барања од Техеран, вклучувајќи прекин на непријателствата во регионот, воспоставување протокол за безбеден премин низ Ормускиот теснец и враќање и укинување на санкциите, објави иранската новинска агенција ИРНА на својот Телеграм канал.

„Аксиос“ претходно објави, повикувајќи се на американски, израелски и регионални извори, дека САД, Иран и регионалните медијатори разговараат за потенцијално 45-дневно примирје како дел од двофазен договор што би можел да доведе до траен крај на војната.

Трамп во неделата изјави дека САД ќе ги нападнат иранските електрани и мостови во вторник во 20 часот по источно време доколку не се постигне договор и Иран не го отвори Ормускиот теснец.

Во објава на социјалните медиуми, Трамп, исто така, се закани дека ќе ја уништи клучната инфраструктура на Иран, вклучувајќи ги електраните и мостовите, без да го прецизира обемот на можните напади.

Претседателот на Соединетите Американски Држави изјави дека главната цел на конфликтот со Иран е да се спречи Техеран да поседува нуклеарно оружје, додавајќи дека војната може брзо да заврши ако иранските власти ги исполнат условите поставени од Вашингтон, односно ако Иран „го направи тоа што мора“.

Тој повтори дека „нуклеарното оружје не смее да биде во рацете на лудаци“ и оцени дека нападите на САД и Израел доведоа до „целосна промена на режимот“ во Иран, објави „Скај њуз“.

Трамп изјави дека Иран преговара „со добра волја“ и оцени дека преговарачите таму сега се порационални отколку порано.

Трамп рече дека Соединетите Американски Држави му нанесуваат големи загуби на Иран и се закани дека ако одбие да се предаде, „нема да останат електрани ниту мостови“.

„Да беше до мене, ќе ја земев нафтата на Иран“, рече Трамп, додавајќи дека ќе ја задржи, ќе оствари значителен профит и „подобро ќе се грижи за иранскиот народ“, објави „Ен-би-си њуз“.

Тој исто така рече дека „иранскиот режим е целосно уништен“ и дека Иран во моментов е неспособен да пружи отпор, и покрај тоа што поседува голем број ракети и беспилотни летала.

Зборувајќи за неговите комуникации на социјалните медиуми, Трамп рече дека користел „остар јазик“ на неговата платформа „Трут соушал“ за да ја пренесе својата порака, оценувајќи дека таа ја пренела пораката.

Тој рече дека американската јавност сака војниците да се вратат дома, но исто така сака да победи, додавајќи дека САД можат да се повлечат од Иран, но дека тој сака да „ја заврши работата“.

Тој исто така рече дека имало планови за вооружување на демонстрантите во Иран, но дека, како што тврди, одредена група го задржала оружјето.

Според него, иранските власти ги спречуваат протестите со закани дека ќе пукаат, предупредувајќи дека демонстрантите ќе бидат директно цел ако излезат на улица, но дека народот ќе се спротивстави ако им се даде оружје.

Трамп изјави дека американските хеликоптери биле изложени на силен оган за време на операциите за спасување во Иран, но дека спасените пилоти се „добро“.

Тој оцени дека прекинот на бомбардирањето би значел враќање на иранскиот режим и дека обновата на земјата би можела да трае до 15 години.

Кога беше прашан за Обединетото Кралство, Трамп, алудирајќи на премиерот Кир Стармер, изјави дека „светот не сака уште еден Невил Чемберлен“, поранешниот британски премиер од времето пред Втората светска војна, познат по својата политика на смирување кон нацистичка Германија.