Претседателот на САД, Доналд Трамп, денес изјави дека ќе бара отштета од Иран како дел од какви било мировни преговори. Тој ги наведе нападите и атентатите од изминатите децении за кои тврди дека биле поддржани или директно извршени од Техеран. Преговорите за завршување на војната и повторно отворање на Ормускиот теснец се во застој, а новите барања би можеле дополнително да ја комплицираат ситуацијата, објави „Еуроњуз“.
Објавата на Трамп е директен одговор на барањето на Техеран САД да платат воени отштета како предуслов за решавање на конфликтот. „Барам и отштета од Иран“, рече Трамп. Тој прецизираше дека неговото барање вклучува не само штети од сегашната војна, туку и ирански напади врз американски цели во текот на изминатите дваесет години. Вклучува и отштета за семејствата на иранските демонстранти убиени од владата во текот на изминатите педесет години.
Трамп подоцна додаде во нова изјава дека „Исламската Република треба да биде одговорна и за смртните случаи и штетите во Либан, Сирија, Јемен и Газа“.
Минатата недела, Трамп се закани дека силно ќе го удри Иран и спомена напади врз цивилната инфраструктура, но потоа се повлече и сигнализираше дека мировниот договор е блиску. Во текот на викендот, тој рече дека го омекнува својот пристап кон конфликтот и посочи дека претпочита економски притисок пред нови воени напади.
Веб-страницата „Аксиос“ објави дека американскиот претседател не покажал фрустрација во интервју објавено вчера поради одложувањето на Иран во договорот за отворање на Ормутскиот теснец. Техеран бара САД прво да ја прекинат блокадата на иранските пристаништа и да ги укинат санкциите врз нивната нафтена индустрија.
Трамп, исто така, го спомена бомбардирањето на бродот „Кол“ во 2000 година, за кое претходно рече дека Иран е „веројатно вклучен“. Тој денес рече дека неговите барања за компензација ќе бидат „цврст дел од сите идни преговори“ со Иран.
Во меѓувреме, врховниот лидер на Иран, Моџтаба Хамнеи, денес го назначи генералот на Револуционерната гарда, Али Абдолахи, за началник на Генералштабот на вооружените сили. Тој, исто така, го потврди и новиот командант на Гардата, зацврстувајќи го своето влијание врз војската.
Абдолахи претходно ја водеше Хатам ал-Анбија, централната воена команда одговорна за координирање на операциите меѓу различните гранки на војската. „Генерал-мајор Али Абдолахи е назначен за началник на Генералштабот на вооружените сили. Бригадниот генерал Ахмад Вахиди е назначен и за врховен командант на Корпусот на Исламската револуционерна гарда со ранг на генерал-мајор“, се вели во соопштението на веб-страницата на Хамнеи.
