Топлинска купола над Европа носи жежок финиш на мај со температура над30 степени – Пресврт на времето по студениот бран

Само неколку дена по невообичаено студениот бран, Европа е на пат да доживее целосен пресврт. Според „Сивиар ведер Јуроп“, се развива топлинска купола која би можела да урне рекорди на голем дел од континентот. Силна термална маса ќе се развие над северозападна Африка кон југозападна и западна Европа. Сè ќе се прошири подалеку на север и исток и ќе доминира во поголемиот дел од европскиот континент во текот на остатокот од мај. Температурата би можела да биде над 30 Целзиусови степени на некои места уште во недела и во текот на првите денови од следната недела.

Делови од југозападна и западна Европа ќе ги имаат своите први вистински топли денови годинава. До почетокот на следната недела, најтоплите и најаномалните воздушни маси ќе бидат над Шпанија, Португалија, Франција, Бенелукс и Обединетото Кралство. До средината на следната недела, ширењето ќе продолжи кон север и кон исток. Температурата ќе се движи од 12 до 16 Целзиусови степени над просекот за крајот на мај, локално и повеќе.

Температурата постепено ќе се зголемува овој месец и ќе достигне околу 30 Целзиусови степени во Медитеранскиот Регион, Италија, Централна Европа и Балканот. Иако сè уште не е сосема јасно каква ќе биде максималната температура, следната недела, во секој случај, ќе биде невообичаено топла за крајот на мај.

Феноменот топлинска купола е обликуван од многу топла воздушна маса во горните слоеви на атмосферата, а тоа е временски модел што носи висока, а понекогаш и рекордна температура во областа под него. Топлинската купола, објаснува „Сивиар ведер Јуроп“, дејствува како капак на тенџере. Го заробува топлиот воздух на сите нивоа под него, додека слоевите се спуштаат кон земјата.