Поранешниот германски репрезентативец Тони Крос уште еднаш јавно му оддаде огромно признание на Лионел Меси, оценувајќи дека Аргентинецот е најдобриот фудбалер што некогаш го гледал.
Легендарниот играч за врска, кој остави длабока трага во Баерн Минхен и Реал Мадрид, истакна дека никогаш не видел фудбалер кој толку долго успевал да игра на највисоко можно ниво.
Крос нагласи дека неговата процена не е водена од навивачки симпатии, туку исклучиво од она што го видел на теренот низ годините.
- Никогаш не сум видел фудбалер кој игра со таква конзистентност како Меси. Треба да се земе предвид дека никогаш не играл за клубовите што ги сакам, што докажува дека сум објективен. Тој е најдобриот што сум го гледал, изјави Крос.
Неговите зборови имаат дополнителна тежина ако се знае дека најголемиот дел од кариерата го помина во Реал Мадрид, најголемиот ривал на Барселона.
Токму во дресот на „кралскиот клуб“, Германецот водеше бројни големи битки против Меси во „Ел Класико“ и одблизу можеше да се увери во неговиот неверојатен квалитет.
Во својата богата кариера, Аргентинецот освои речиси сè што може да се освои на клупско и репрезентативно ниво.
Со Аргентина ја освои Копа Америка, а во 2022 година конечно стигна и до светската титула, со што го комплетираше својот богат трофеен список. На клупски план, освои бројни титули во Шпанија и Франција, четири пехари во Лигата на шампионите и голем број индивидуални признанија.
Посебно се издвојуваат рекордните осум „златни топки“, што дополнително го зацврстија неговиот статус како еден од најголемите во историјата.
Иако дебатата за најдобриот фудбалер на сите времиња и понатаму ги дели љубителите на фудбалот, Крос нема никаква дилема. Според него, ниту еден играч не успеал толку долго да биде доминантен и да ја задржи истата магија на теренот како Лионел Меси.
Аргентинецот и натаму е активен и има можност да ја збогати својата легендарна кариера со нови успеси, но за многумина веќе одамна го обезбедил своето место на самиот врв на фудбалската историја.
