„Тенисот нема да опстане до 2050 година“

Патрик Муратоглу, во интервју за францускиот „Еуроспорт“, кажа дека белиот спорт може да се соочи со сериозни проблеми до средината на овој век. Иако никогаш не бил професионален играч, Муратоглу е сопственик на престижна академија недалеку од Ница и бил тренер на големи ѕвезди како Серена Вилијамс, Наоми Осака, Холгер Руне… Тој е и основач на експерименталниот турнир УТС, кој се одржува оваа недела, во Ним, со учесници како Григор Димитров, Данил Медведев, Каспер Руд… Тој предупредува дека не е доволна сегашната популарност на тенисот за да ја гарантира неговата иднина.

• Тенисот е многу популарен спорт, но неговите гледачи се претежно постари. Мојата генерација се вљуби во оваа игра во 70-тите и 80-тите години. Затоа има спонзори и ТВ-права. Сè е добро во овој сегмент, но кога луѓето што сега имаат 20-30 години ќе ги достигнат тие зрели години, базата на навивачи многу ќе се намали. Нема да има повеќе тенис. Убаво е да се зачува традицијата, но мора да размислуваме и за иднината. АТП и гренд слем турнирите живеат во сегашниот момент, тие го прават тоа многу добро бидејќи тенисот сега е многу профитабилен, но никој не размислува за тоа што ќе донесе времето – рече францускиот стручњак.

Тој додава дека без промени, спортот, можеби, нема да опстане до 2050 година.

• Навистина не разбирам како ќе опстане тенисот до 2050 или 2055 година, не гледам начин да се направи тоа. Секој спорт е профитабилен сè додека има гледачи. Ако нема широка база на навивачи, нема да има ниту спонзори. Ако е точно истражувањето дека луѓето под 30 години не гледаат такви натпревари, тенисот е во опасност отсега и во следните 30 години.

Муратоглу, исто така, го нагласи и проблемот со застарените правила.

• Тенисот постои од 1900 година, а неговите правила воопшто не се променети. Единственото нешто што се промени е начинот на броење, бидејќи во 1971 година беше воведен тај-брејк во сите сетови, освен во петтиот, а неодамна и тоа беше променето. Сега начинот на гледање е целосно променет. Социјалните мрежи, платформите за стриминг, видеоигрите… сето ова го промени начинот на живот. Дури и помладите играчи велат дека не гледаат цели натпревари, бидејќи се предолги, туку само најважните делови. Едноставно, тенискиот производ повеќе не е соодветен. Можеби е за мене и мојата генерација, но не и за младите луѓе.