Со „Шаховско утро“ се одбележува Меѓународниот ден на шахот

По повод Меѓународниот ден на шахот, Општина Карпош организира „Шаховско утро“, кое ќе се одржи утре со почеток во 9:00 часот, на платото пред „Млечен“.

Од Општината информираат дека настанот има цел да го промовира шахот како интелектуална игра што ги развива логичкото размислување, концентрацијата, стратегиското планирање и спортскиот дух, како и да поттикне дружење и меѓугенерациско поврзување.

На настанот ќе присуствува и градоначалникот на Општина Карпош, Сотир Лукровски, кој ќе се придружи на заедничкото одбележување на овој значаен ден.

– Со организирањето вакви настани, Општина Карпош продолжува да промовира активности што ги поттикнуваат здравите животни навики, интелектуалниот развој, спортскиот дух и активното учество на граѓаните во животот на локалната заедница – велат од локалната самоуправа.