Шекспировата „Кориолан“ доби битолски печат – магична изведба на магична сцена

Претставата „Кориолан“ од Вилијам Шекспир, во режија на американскиот режисер Џон Блондел, завчеравечер ја имаше својата магична изведба во предворјето на црквата „Света Софија“ во Охрид – магично место со стари корени. Претставата беше успешно одиграна од актерите од Битолскиот театар, а нивната енергија и сценскиот израз совршено одговараа на материјалот, додека визуелните и музичките автори од ансамблот ја издигнаа оваа политичка трагедија до високо ниво на театарска поезија. Режисерот Џон Блондел посочи дека „Кориолан“, иако е напишан пред повеќе од четири века, останува актуелен поради темите за моќта, политиката и односот меѓу власта и народот.

Улогите во „Кориолан“ ги толкуваа: Васко Мавровски, Петар Горко, Борче Ѓаковски, Марјан Георгиевски, Сандра Грибовска, Јулијана Мирчевска и Петар Спировски.  Сценографијата и костимите се на Благој Мицевски, а музиката за претставата ја напиша Александар Димовски.

Според Блондел, претставата е одиграна во неверојатен простор.

– Атмосферата е извонредна за гледање претстава како оваа, вкоренета во минатото и во сегашноста. Ова е перформанс полн со интимни, автентични и изненадувачки моменти. Се надевам дека гледачите, понесени од приказната, ќе ја вметнат во својата имагинација за да се почувствуваат како да се на сцена – рече режисерот Блондел, кому ова му е петта соработка со битолските актери.

Според директорот на Народниот театар – Битола, Васко Мавровски, се работи за интересна претстава со нова естетика, која од 40-ина ликови е сведена само на седум и во неа, како што вели, е собрано само есенцијалното од текстот.

– Секогаш кога ќе се спомене Шекспир, луѓето очекуваат дека тоа ќе трае два часа и повеќе. Успеавме за 80-ина минути да направиме многу добра и естетски поткована претстава на наш препознатлив јазик, кој е препознатлив и за режисерот Блондел, кој по стоти пат го покажува тоа на сцената – појаснува Мавровски.

Концептот на претставата е насочен кон минималистичкиот сценски израз, со акцент на актерската игра и на текстот.

– Сум играл на „Охридско лето“ многупати, со Битолскиот театар и сцената ја доживувам како матична. Воодушевува  да се игра на толку импозантно место каде што има акустика, историја, има сè. Овде, на оваа сцена, прошетале илјадници глумци од целиот свет – вели битолскиот актер, Петар Горко. И на сценографот и костимограф Благој Мицевски оваа театарска претстава не му е прво гостување на „Охридско лето“.

– Повеќе од 30 години, речиси секоја година, сме биле учесници на „Охридско лето“. Да бидам искрен, сум учествувал и со неколку претстави. Сме биле на Плаошник, на Самоиловата тврдина, Канео, многупати и во Долни Сарај, кај изворите во Свети Наум, кај некогашниот хотел „Парк“, но „Света Софија“ си има своја енергија. Едноставно, те прима, те прифаќа и те прегрнува – вели Мицевски.

По македонската премиера на „Охридско лето“, претставата „Кориолан“ ќе ја има својата светска фестивалска премиера на фестивалот „Фринџ“ во Верона, Италија.