Романија доби нова влада: Парламентот го одобри кабинетот на Лука Никулеску

Романскиот парламент денес гласаше за поддршка на кабинетот предложен од мандатарот Лука Никулеску, независен кандидат кој има за цел да стави крај на повеќемесечната политичка криза.

Пред неколку недели, претседателот Никушор Дан го назначи 55-годишниот Никулеску – дипломат и поранешен новинар – за мандатар за состав на влада.

Тројцата претходни кандидати номинирани од Дан не успеаја да формираат влада.

Се очекуваше Никулеску да успее, бидејќи обезбеди поддршка од Социјалдемократите и други политички сили за формирање малцинска влада.

Обраќајќи му се на Парламентот пред гласањето, Никулеску им порача на пратениците дека Романија „нема време за губење“ и дека неговата влада ќе биде онаа што „носи пари и инвестиции во земјата и го штити романскиот народ“.

Предлогот доби 338 гласа „за“, додека 58 пратеници гласаа „против“.

Романија е зафатена од политичка криза уште од мај, кога премиерот Илие Болојан беше сменет по изгласувањето недоверба.

Иницијативата за негово отповикување беше поднесена заеднички од Социјалдемократската партија – која беше дел од владејачката коалиција – и Алијансата за обединување на Романците.

Кога претходната коалиција дојде на власт во 2025 година, Болојан ја презеде функцијата со цел да стави крај на една од најтешките политички кризи во посткомунистичката историја на Романија и да го намали огромниот буџетски дефицит на земјата. Романија се соочува со долг период на нестабилност по поништувањето на претседателските избори во декември 2024 година.

Земјата, исто така, се соочува со еден од најголемите буџетски дефицити во Европската унија, висока инфлација и техничка рецесија, пренесе „Танјуг“.