Родригез: Енергетскиот договор со САД ќе остане на сила 25 години

Привремената претседателка на Венецуела, Делси Родригез, изјави дека енергетскиот договор со САД ќе остане на сила 25 години.

Родригез, зборувајќи на државната телевизија VTV, рече дека договорот со САД е „историски“ и дека ќе помогне во оживувањето на економијата и зголемувањето на државните приходи, објави „Ројтерс“.

„Овој 25-годишен билатерален проект предвидува развој на 17 стратешки нафтени полиња со цел за производство од над 1,5 милиони барели дневно. Оваа бројка се однесува исклучиво на билатералниот договор меѓу Венецуела и САД“, рече Родригез.
Таа додаде дека производството од 1,5 милиони барели дневно е само почетна цел и дека поширокиот план вклучува развој на осум нафтени блокови, како дел од поширокото проширување на енергетскиот сектор на земјата.

Родригез рече дека договорот би можел да генерира околу 209 милијарди долари приходи за венецуелската држава, врз основа на референтната цена на нафтата од 65 долари за барел.

Таа истакна дека околу 19 долари од секој барел произведен и продаден според договорот со САД ќе оди директно во Венецуела, што значително ќе ги зголеми приходите на владата.

Родригез, исто така, рече дека земјата ја задржува „сопственоста и суверенитетот“ над своите природни ресурси, а „во исто време користи капитал, технологија и оперативна експертиза за поддршка на закрепнувањето на стратешките индустрии кои беа сериозно погодени од санкциите“.

Претседателот на САД, Доналд Трамп, пред два дена објави планови САД да преземат делумна контрола врз огромните резерви на нафта на Венецуела, велејќи дека американските компании би можеле да помогнат во оживувањето на енергетската индустрија на јужноамериканската нација, а истовремено да обезбедат нов извор на сурова нафта што би помогнал во намалувањето на цените на горивата во САД.

Трамп даде малку детали за договорот, велејќи само дека САД обезбедиле мнозинска контрола врз повеќе од 65 милијарди барели од докажаните резерви на нафта на Венецуела преку партнерство со приватни компании.

Венецуела има најголеми докажани резерви на нафта во светот, но произведува само околу 1,25 милиони барели дневно по години недоволно инвестирање, лошо управување и санкции, пренесе „Танјуг“.