УНХЦР: Најмалку 4,5 милиони луѓе низ целиот свет се без државјанство

Најмалку 4,5 милиони луѓе низ целиот свет се без државјанство или нивниот статус на државјанство е неопределен, објави денес УНХЦР.

УНХЦР ги повикува државите да обноват политичка обврска за спречување и искоренување на бездржавјанството, 65 години по усвојувањето на Конвенцијата на ОН за намалување на бездржавјанството.

Директорката на УНХЦР за меѓународна заштита и решенија, Елизабет Тан, изјави дека милиони други луѓе кои се соочуваат со проблемот на бездржавјанство остануваат надвор од официјалните податоци.

„За нив, бездржавјанството е секојдневна реалност што може целосно да го запре животот и честопати да зароби цели генерации во циклус на исклучување и неизвесност“, рече Тан.

Лицата без државјанство честопати не се во можност да добијат лични документи, да одат на училиште, да пристапат до здравствена заштита или да работат легално, а во многу случаи не се во можност да го регистрираат раѓањето на дете, да се омажат, да поседуваат имот, да отворат банкарска сметка или слободно да патуваат.

Конвенцијата од 1954 година за статусот на лицата без државјанство воспостави заштита за оние кои веќе се без државјанство, додека Конвенцијата од 1961 година за намалување на бездржавјанството воведе механизми за спречување на појавата на бездржавјанство, вклучително и заштита на децата од раѓање без државјанство.

Конвенцијата од 1961 година е ратификувана од 82 држави, а Словенија, Јужен Судан и Сао Томе и Принсипе се меѓу најновите земји-членки.

Организацијата ги повика државите да ги заштитат лицата без државјанство, да им обезбедат патишта до државјанство, да ги реформираат дискриминаторските закони и практики, да пристапат кон конвенциите на ОН за бездржавјанство и да се приклучат кон Глобалната алијанса за искоренување на бездржавјанството.

Од 2014 година, повеќе од 650.000 лица без државјанство го стекнале или потврдиле своето државјанство, додека 94 земји ги подобрија своите закони за државјанство за да помогнат во спречувањето на бездржавјанството.