Рускиот претседател Владимир Путин се согласи да се обноват мировните преговори меѓу Русија, Украина и Соединетите Држави (САД) – со американско посредување – уште следниот месец, соопшти вчера Кремљ, по средбата меѓу Путин и американскиот пратеник Стив Виткоф.
Од Кремљ наведоа дека новите трилатерални мировни преговори би можеле да се одржат во Абу Даби и ќе бидат фокусирани на безбедносните гаранции и за Украина и за Русија по завршувањето на војната. Беше најавено дека преговорите би можеле да започнат на 10 ноември или по тој датум.
Последната рунда мировни преговори со американско посредување се одржа во февруари, пред избувнувањето на војната меѓу САД/Израел и Иран.
Сепак, Кремљ изрази значително помал оптимизам во однос на разговорите што Виткоф ги водеше еден ден претходно во Осло со украинскиот претседател Володимир Зеленски, лидерите на Финска и Норвешка, како и со претставници од Европа и НАТО.
Виткоф му пренел на Путин дека тие разговори покажале одреден напредок, додека еден американски функционер истакна дека Украина изнела нови идеи и предлози.
„Овие нијанси, така да се каже, не нè задоволуваат целосно“, изјави за новинарите помошникот на рускиот претседател, Јуриј Ушаков, по средбата во Санкт Петербург, која траеше речиси три часа.
Украина и Русија остануваат на спротивставени ставови во однос на условите за евентуален мировен договор, иако Трамп во последните недели го зголеми притисокот врз Украина за постигнување некаков вид договор.
За време на разговорот, Путин понуди да му помогне на Трамп во односите со Иран, истакнувајќи дека Русија со децении одржува блиски врски со Техеран и постојано нудела да ги искористи тие врски за да се адресираат загриженостите на САД во врска со иранската нуклеарна програма. Од Кремљ соопштија дека Путин му рекол на Виткоф оти е можно, па дури и неопходно, да се постигне договор со Техеран.
Рускиот претседател исто така предложи Русија да испорача големи количества ѓубрива за САД, како поддршка за американските земјоделци.
Исто така, се разговараше и за можноста за средба во Кина следниот месец, на која би учествувале Трамп и кинескиот претседател Шји Џинпинг. Кремљ тврди дека Пекинг веќе се подготвува за она што би претставувало прва средба од ваков вид во историјата.
