Пријавени се нови напади врз иранската војска на остров во близина на Ормускиот теснец

Иранските државни медиуми попладнево објавија дека се во тек нови напади врз воени цели на иранскиот остров Кешм, во близина на Ормускиот теснец.

Иранската државна новинска агенција го цитираше гувернерот на островот како вели дека од попладнево биле испукани околу 10 ракети и дека немало жртви.

Немаше непосреден коментар од американската војска, која претходно денес соопшти дека погодила околу 140 цели во Иран како одговор на најновиот ирански напад врз трговски брод во теснецот.

Иран одговори со напади врз земјите од Блискиот Исток, вклучувајќи ги Бахреин, Кувајт, Катар, Јордан и Оман. Оман се наоѓа на другата страна од Ормускиот теснец, а Техеран врши притисок врз него да се приклучи во управувањето со сообраќајот низ стратешки важниот воден пат.

Борбите повторно отвораат прашања бидејќи Иран и САД се речиси на половина од 60-дневниот период договорен во привремениот договор, во кој треба да постигнат договор за конечно завршување на војната.

Теснецот, клучен пат за глобалните испораки на нафта и природен гас и долго време се сметаше за меѓународен воден пат, стана клучна точка на сопнување во разговорите кои се во опасност да пропаднат, пренесе „Бета“.