Предлог-закон поврзан со Србија, изготвен од сенатори од двете главни американски партии, е поднесен до американскиот Сенат на разгледување.
Меѓу другото, тој има за цел да ја поддржи владеењето на правото и независното функционирање на институциите, јавува вечерва Радио Слободна Европа.
Предлогот заеднички го поднесоа републиканскиот сенатор Чак Грасли и демократскиот сенатор Ричард Блументал.
Веб-страницата на Сенатот покажува дека предлог-законот е формално вклучен во законодавната процедура. Самиот текст сè уште не е објавен.
За еден предлог-закон да биде усвоен од Конгресот, тој прво мора да помине низ двата дома – Сенатот и Претставничкиот дом. Потоа мора да биде потпишан од американскиот претседател Доналд Трамп.
Кон крајот на август, предлог-законот беше поднесен во Претставничкиот дом од конгресмените Џо Вилсон (републиканец кој неодамна се истакна со критики кон српската влада) и Бил Китинг (демократ).
„Им благодарам на сенаторите Грасли и Блументал за поднесувањето на предлог-законот за Србија во Сенатот. Режимот на (Александар) Вучиќ очајнички се бори да остане на власт. Изборите во Србија мора да бидат слободни и фер“, напиша Вилсон на платформата „Икс“.
Според предлогот поднесен од Вилсон и Китинг, САД би вовеле финансиски и визни санкции за злонамерни актери кои придонесуваат кон дестабилизација на Западен Балкан, како и за поединци кои го загрозуваат мирот, безбедноста, стабилноста или територијалниот интегритет на која било област или држава во регионот.
Во предлогот се укажува на „сериозно демократско назадување“, точка што беше истакната и во извештајот на Европскиот парламент за Србија од 2025 година.
Се предлага САД да го замрзнат стратешкиот дијалог со Србија доколку во разговорите не се опфатат прашањата за слободни и фер избори, како и врските на Белград со Пекинг и Москва.
Доколку Стејт департментот не постапи така, се наведува во предлогот, Конгресот – кој управува со државната каса – не треба да го одобри неговиот оперативен буџет, пренесува Радио Слободна Европа.
