Потпишан Меморандум за соработка: Црна Гора и Бугарија во заеднички поход на Антарктикот

Меморандум за соработка помеѓу Институтот за морска биологија на Универзитетот во Црна Гора и Бугарскиот антарктички институт беше потпишан во рамките на официјалната посета на претседателот на Црна Гора, Јаков Милатовиќ, на Бугарија.

Документ за соработка помеѓу Црна Гора и Бугарија во областа на истражувањето на Антарктикот потпишаа директорот на Институтот за морска биологија, д-р Мирко Ѓуровиќ, и претседателот на Бугарскиот антарктички институт, Христо Пимпирев, објави РТС.

„Со овој Меморандум, црногорските научници добиваат пристап до истражувачки експедиции на Антарктикот, што отвора ново поглавје во меѓународната научна соработка на Црна Гора“, се наведува во соопштението од Кабинетот на претседателот на Црна Гора.

Милатовиќ го изрази своето задоволство од меморандумот, нагласувајќи дека ова е историски момент за црногорската научна заедница: „Ова партнерство им овозможува на нашите истражувачи да станат дел од глобалните научни напори во проучувањето на климатските промени и антарктичкиот екосистем. Со овој чекор, Црна Гора покажува дека има капацитет да придонесе во меѓународната наука преку учество во глобални истражувачки проекти“.

На потпишувањето на Меморандумот му претходеше првата мисија на црногорската научна заедница на Антарктикот, во која, како дел од бугарската мисија „Св. Климент Охридски“, учествуваше д-р Весна Мачиќ од Институтот за морска биологија Котор.

Меморандумот дефинира неколку области на соработка, вклучувајќи заеднички експедиции, размена на научни податоци, обука и развој на истражувачки капацитети, како и размена на истражувачи и студенти.