Потпишан договор за надзор над изградбата на автопатот Кичево – Букојчани

Јавното претпријатие за државни патишта почна со конкретна реализација на проектот за изградба на автопатската делница Кичево – Букојчани, долга 11,5 километри. Во таа насока е потпишан договор за надзор над градежните работи, со кој треба да се обезбеди нивно квалитетно, безбедно и навремено изведување.

Договорот е склучен со конзорциум предводен од „Градежен институт Македонија“ АД Скопје, во кој членуваат „ДИВИ Македонија“ ДОО Скопје и ГЕИНГ ДОО Скопје. Изборот на надзорниот орган следува по двофазната тендерска постапка со претквалификација, спроведена преку меѓународен отворен тендер според правилата на Европската банка за обнова и развој, со нејзино одобрување.

Делницата Кичево – Букојчани е дел од Коридорот 8 и ќе се реализира во две фази. Првата ја опфаќа трасата од селото Црвевци до Кичево, додека втората ќе го поврзува селото Долно Строгомиште со Црвевци. Според ЈПДП, изградбата треба да обезбеди современа и побезбедна патна врска, особено имајќи ги предвид сложениот ридско-планински терен и постојното патно решение преку Стража.

Надзорниот орган ќе ја следи реализацијата на градежните работи согласно со проектната документација и предвидените стандарди за квалитет, безбедност и за изведба.