По помалку од една година во агенцијата: Заменик-директорот на ФБИ поднесе оставка

Ендрју Бејли, заменик-директор на Федералното биро за истраги (ФБИ), денес ја објави својата оставка – нешто повеќе од една година откако се приклучи на оваа американска федерална агенција – наведувајќи семејни причини за своето заминување.

Бејли, републиканец и сојузник на американскиот претседател Доналд Трамп, ја напушти функцијата јавен обвинител на Мисури за да се приклучи на ФБИ, каде што работеше под раководство на директорот на агенцијата, Каш Пател.

За време на неговиот мандат во ФБИ, тој помагаше во надзорот на истрагите поврзани со изборите; претходно оваа година, тој беше присутен кога агентите на ФБИ ги запленија гласачките ливчиња од изборите во 2020 година во сојузната држава Џорџија, пренесува „Ројтерс“.

„Уверен сум дека директорот Пател ќе продолжи да го реформира ФБИ, да се бори против насилниот криминал, да ја штити татковината, да обезбеди силна одговорност во рамките на организацијата и да ја врати довербата на јавноста во оваа институција“, изјави Бејли на социјалните мрежи.

Функцијата заменик-директор на ФБИ, која подразбира надзор врз секојдневните операции на агенцијата, традиционално е неполитичка и ја извршуваат кариерни службеници на ФБИ. Сепак, администрацијата на Трамп назначи политички сојузници на оваа позиција како дел од пошироката реорганизација на работењето на агенцијата.

Бејли првично беше еден од двајцата заменици-директори, заедно со Ден Бонџино – поранешен агент на Тајната служба на САД и конзервативен подкастер – кој го напушти ФБИ во јануари. Во меѓувреме, искусниот службеник на ФБИ, Кристофер Вреј, е дел од тричлениот раководен тим на агенцијата, заедно со Бејли и Пател, пренесува „Танјуг“.

Заминувањето на Бејли се случува околу пет недели пред изборите за Конгресот на САД, кои ќе ја одредат контролата врз двата дома на американското законодавно тело.

За време на неговиот мандат во ФБИ, Бејли учествуваше во истраги поврзани со администрацијата на Трамп и прашања поврзани со изборите. ФБИ ги испитуваше изборните записи во неколку сојузни држави, но досега не претстави докази што би ги поткрепиле тврдењата на Трамп дека широко распространета изборна измама довела до неговиот пораз на претседателските избори во 2020 година.