По катастрофалниот земјотрес што ја погоди, Венецуела упати апел за ослободување на нејзините замрзнати средства

Владата на Венецуела во среда побара ослободување на нејзините средства замрзнати во странство за да се финансира реконструкцијата по катастрофалните земјотреси што ја погодија земјата минатиот месец, при што загинаа најмалку 3.600 луѓе. Обединетите нации, исто така, упатија итен апел за помош од 259 милиони евра, објави „Еуроњуз“.

Министерот за надворешни работи Иван Гил Пинто, на состанок со претставници на ОН и партнери, ги повика земјите што имаат замрзнати средства на Венецуела да ги одмрзнат.

„Ги повикуваме сите земји што моментално блокираат средства што ѝ припаѓаат на Венецуела да започнат план за нивно ослободување, за да можат да се користат за напорите за реконструкција“, рече тој. „Постојат сметки што ѝ припаѓаат на венецуелската држава низ целиот свет, кои се замрзнати како резултат на нелегални санкции“. Гил конкретно го спомена златото што се чува во Обединетото Кралство и финансиските средства што ги замрзнаа САД.

САД веќе укинаа серија економски санкции против Венецуела за период од четири месеци за да се олесни испораката на помошта.

Вашингтон воведе обемни економски санкции врз Венецуела, особено од 2019 година, во обид да изврши притисок врз левичарската влада на претседателот Николас Мадуро, која САД ја сметаат за нелегитимна. Откако американските сили го соборија Мадуро во јануари, односите со Каракас се подобрија. Администрацијата на Трамп ја поддржа привремената претседателка Делси Родригез и постепено ги ублажи санкциите, особено за да се олесни развојот на огромните нафтени резерви на Венецуела.

Речиси две недели по земјотресите со јачина од 7,3 и 7,5 степени, меѓународните спасувачки екипи ја прекинуваат потрагата по преживеани, додека семејствата ги пребаруваат урнатините за телата на своите најблиски. Во вторник, владата објави нови податоци, според кои бројот на жртви се искачи на 3.685, а речиси 17.000 луѓе се повредени.

Обединетите нации во среда упатија итен апел за собирање 296 милиони долари (259 милиони евра) за операции за помош по земјотресот. Хуманитарните потреби се огромни по една од најлошите земјотресни катастрофи во Латинска Америка, во која илјадници луѓе останаа без покрив над главата, а илјадници други исчезнати, особено во тешко погодената Ла Гваира, каде што семејствата сè уште копаат низ урнатините.

„Донаторите веќе ги засилуваат своите напори, за што им оддавам признание и им се заблагодарувам“, рече шефот на хуманитарната помош на ОН, Том Флечер, на состанокот посветен на катастрофата.

„Според податоците што ги следиме, веќе се собрани 300 милиони долари (263 милиони евра) за одговор на кризата во Венецуела и го ценам секој долар од таа поддршка, вклучувајќи ги и 115 милиони долари (100 милиони евра) добиени пред земјотресот. Ова значи дека ни недостасуваат 627 милиони долари (549 милиони евра) за решавање на итни потреби“, објасни тој.

„Имаме јасен план. Ни требаат 296 милиони долари за веднаш, во следните шест месеци, да им помогнеме на 1,3 милиони луѓе во социоекономска потреба. Тоа е план со ограничен рок.“