Еколошката пешачка патека во должина од околу 14 километри, од браната на Тиквешкото Езеро до полошкиот манастир „Свети Ѓорѓи“, е во фаза на мапирање. Активностите ги спроведува еколошкото друштво „Тисовец“ од кавадаречкото село Возарци, со цел да се создадат услови за пешачење, рекреација и за развој на одржливиот туризам во Тиквешијата.
– Пред теренскиот тим се наоѓа сериозен предизвик, особено делот од селото Праведник. Станува збор за исклучително тежок, стрмен и обраснат терен, кој на одредени места е целосно неисчистен и тешко прооден. Мапирањето бара многу пешачење, внимателно утврдување на трасата и посветена работа на терен. И покрај тешкотиите, продолжуваме чекор по чекор, со цел да ја утврдиме трасата и да создадеме основа за нејзино идно уредување, чистење и обележување. Нашата цел е да ги поврземе природните убавини на Тиквешијата со културното и со духовното наследство на полошкиот манастир „Свети Ѓорѓи“, создавајќи можности за пешачење, рекреација, едукација и за развој на одржливиот туризам – појасни Сашко Данов, претседател на здружението.
Тој истакна дека секој изоден дел од трасата е чекор поблиску до остварувањето на идејата – екопатека што ќе им овозможи на граѓаните и на посетителите подобро да ги запознаат природата и културното наследство на овој крај. Досега се одеше со чамец.
