Париз воведува нови забрани! Се ограничуваат собирите и околу туристичките атракции

Париската полициска префектура издаде наредба со која се забрануваат собири и демонстрации во одредени делови на Париз – првенствено во центарот на градот – денес во периодот од 08:00 до 20:00 часот. Според весникот „Ле Фигаро“, собирите и демонстрациите се забранети во близина на Елисејската палата, хотелот „Матињон“ (седиштето на премиерот), Националното собрание и Сенатот, како и во туристичките зони, како што се музејот Лувр и авенијата Шанзелизе.

„Во овие зони се забранува присуство и движење на поединци кои учествуваат во поворки, паради или собири што не се пријавени во согласност со законот“, се наведува во наредбата, која беше објавена на платформата X.
Забраната опфаќа и повеќе железнички станици во Париз, плоштадите „Итали“ (Place d’Italie), „Бастил“ (Place de la Bastille) и „Републик“ (Place de la République), квартот „Шателе – Ле Ал“ (Châtelet–Les Halles), островот „Ил де ла Сите“ (Île de la Cité), како и подрачјето каде што се наоѓаат големите стоковни куќи.

Бран масовни протести во Франција започна кон средината на септември, првично како локален штрајк и бунт на ученици и наставници во едно средно училиште во посиромашните париски предградија. Немирите беа поттикнати од лошите услови во образовниот систем, вклучително и хроничниот недостиг на наставен кадар, пренатрупаните училници и дотраените училишни објекти.

Оттогаш, протестите се проширија во средните училишта и на универзитетите низ целата земја, проследени со масовни блокади и судири со полицијата. Кон демонстрациите се приклучија синдикати, родители и активисти од поранешното движење „Жолти елеци“; првичните барања за реформа во образованието прераснаа во масовни улични протести против високите трошоци за живот, растот на цените на горивата и владините мерки за штедење.