| На 1 септември, на Градскиот плоштад |
Еден од најголемите оперски пејачи на сите времиња, шпанскиот тенор Хозе Карерас, на 1 септември ќе пее на Градскиот плоштад во Скопје, по повод 35 години независност на Македонија. На концертот ќе настапи и Македонија „ол стар“: Каролина Гочева, Влатко Стефановски, Калиопи, Наум Петрески, Сузана Спасовска и Игор и Ана Дурловски.
Владината портпаролка, Марија Митева, денеска, на прес-конференција, посочи дека, како Влада, се подготвуваат за достојно одбележување на 35 години независност.
– Навистина ни е важно, сакаме граѓаните да уживаат и да покажеме дека имаме капацитет да организираме настан со македонски и со светски ѕвезди – изјави Митева.
Таа додаде дека ќе следуваат уште настани, кои ќе бидат дополнително откриени.
Бобан Милошески од „Авалон продукција“, пак, рече дека тоа е вечер на спој на македонската музика со светската класика.
– Сакавме да споиме нешто што е светско заедно со нашето македонско. Ќе има многу изненадувања таа вечер, кои нема да бидат соопштени. Оваа екипа на Македонија „ол стар“ е мој личен избор и јас носам одговорност дали требало да има уште некој друг – изјави Милошески.
Тој посочи дека биле повикани и Владо Јаневски и Симон Трпчески, кои, за жал, нема да бидат во Македонија во тој период и нема да може да настапат.
Настанот е поддржан од Македонската филхармонија, а аранжманот на песните ќе го прави Николче Мицевски.
Директорот на Македонската филхармонија, Мустафа Имери, кажа дека му е чест што токму оркестарот на Филхармонијата ќе ја отвори прославата по повод 35 години независност.
Инаку, ова е втор настан за одбележување на независноста на државата, по настапот на Давид Гета и „Монолит шоу“ на 8 Септември, на Градскиот стадион.
