Министерството за енергетика, рударство и минерални суровини ги претстави новите закони за рударство и геологија, кои предвидуваат усогласување со европските стандарди, дигитализација, поттикнување на инвестициите и засилена заштита на животната средина. Една од најзначајните новини е обврската за обезбедување 100 проценти финансиски гаранции за санација и за рекултивација на рударските простори по завршувањето на експлоатацијата. Со ова, државата треба да обезбеди средства за обновување на теренот и да спречи дополнителни трошоци за граѓаните.
Законските измени предвидуваат и современи правила за управување со рударскиот отпад, задолжителни планови за затворање на рудниците и мерки за санација на историски деградираните подрачја. Државниот секретар во Министерството, Горан Јовановски, вели дека новата законска рамка треба да обезбеди правна сигурност за компаниите, да ги поттикне инвестициите и да овозможи одговорно управување со минералните суровини.
Со посебниот Закон за геологија се воспоставува систем за геолошки истражувања и управување со податоците. Предвидено е и воведување на македонски рударско-геолошки информативен систем, кој треба да го олесни пристапот до информациите.
Од Министерството оценуваат дека предложените реформи ќе придонесат за поефикасни административни постапки, подобра заштита на природата и за одржлив развој на рударско-геолошкиот сектор.
ИЗДВОЕНИ
Обвинителство: Не губиме контрола врз предметот Лотарија, се истражува зошто првиот сведок ја „сврте“ изјавата
За автопатите, годинава се обезбедени 243 милиони евра, дел се заем од домашните банки
Од Владата уверуваат дека платите растат двојно побрзо од инфлацијата
Бизнисот ќе ги дигне на нозе јавните претпријатија што работат со загуби
