Администрацијата на американскиот претседател, Доналд Трамп, формираше тесен круг на земји членки на НАТО за да разговараат за иднината на Алијансата, при што целосно се исклучени од овој формат Велика Британија, Франција и трите балтички држави Литванија, Латвија и Естонија.
Според информациите на влијателниот бриселски портал „Политико“, кој се повикува на дипломатски извори, за октомври во Полска е закажан нов состанок на таканаречената група Берген. Во овој ексклузивен формат, покрај САД, вклучени се претставници од Германија, Полска, Холандија, Норвешка, Шведска и од Финска. Британскиот весник „Телеграф“, исто така, потврдува дека американската делегација е предводена од високиот функционер на Пентагон, Елбриџ Колби. Целта на дискусиите е приспособување на НАТО кон новите финансиски реалности, односно барањето на Вашингтон европските сојузници да преземат многу поголем финансиски и воен товар за сопствената одбрана.
Исклучувањето на двете европски нуклеарни сили, како и на балтичките земји, кои издвојуваат највисок процент од својот БДП за војската, предизвика сериозни шпекулации и немир меѓу сојузниците што останаа пред вратата. Додека поканетите земји тврдат дека целта не е поделба на Алијансата, туку подготовка на предлози, рускиот воен аналитичар Алексеј Леонков оценува за весникот „Московски комсомолец“ дека Трамп се стреми кон строга подреденост и избегнување партнери што бараат директен конфликт со Москва. Од друга страна, американската администрација јавно не ги соопшти критериумите за селекција, а генералниот секретар на НАТО, Марк Руте, преку извештаите на новинската агенција „Бета“, продолжува да уверува во цврстата посветеност на САД за одбрана на Европа.
