Нов парк во Миладиновци

Општина Илинден почна со изградба на нов парк во населеното место Миладиновци, кој ќе биде уште едно уредено зелено катче наменето за сите генерации.

Со проектот е предвидено целосно уредување на постојниот простор со нови зелени површини, пешачки патеки и со соодветна урбана опрема. Во рамките на градежните активности, ќе се изведат нови бетонски и павер-површини, а акцентотќе биде ставен на создавањето содржини за најмладите жители, кои ќе добијат детско катче со кула со лизгалка, лулашка и клацкалка, а предвидени се и клупи за одмор и дружење.

– Со изградбата на паркот, досегашниот простор ќе добие целосно нови изглед и намена, создавајќи уредена и безбедна средина што ќе придонесе за поквалитетно секојдневие на жителите на Миладиновци – истакна градоначалникот на Општина Илинден, Александар Георгиевски.

Од Општина Илинден наведуваат дека уредувањето на јавните површини и создавањето нови зелени и рекреативни содржини остануваат меѓу нивните приоритети.

– Преку реализацијата на ваквите проекти, Општината продолжува да создава похумана, поуредена и пофункционална средина, во која граѓаните ќе имаат повеќе можности за одмор, рекреација и дружење во своето населено место – потенцираат од локалната самоуправа.