„Не одете во Франција, сè гори“: Издадено предупредување до граѓаните во многу земји

Поради ескалацијата на насилните немири, воведувањето полициски час во текот на ноќта во Париз, Ница и Лион, како и целосното затворање на музејот Лувр, голем број европски и азиски земји издадоа итни безбедносни предупредувања до своите граѓани.
Неколку европски и азиски држави ги предупредија своите граѓани кои моментално се наоѓаат во Франција – или планираат да патуваат таму – да бидат претпазливи поради можноста за понатамошни немири и насилни демонстрации. Тие им препорачаа на граѓаните да ги избегнуваат протестните собири и да ги следат упатствата на локалните власти.

Според „Франс 24“, германското Министерство за надворешни работи предупреди дека не може да се исклучат нови немири во наредните денови, притоа апелирајќи до германските државјани да ги почитуваат полициските наредби.

Италија побара од своите граѓани да го пријават својот престој во Франција преку веб-страница или апликација, со цел полесно лоцирање доколку е потребно, додека Чешка ги советуваше своите државјани да се држат подалеку од демонстрации, протестни маршеви и јавни собири.

Чешкото Министерство за надворешни работи оцени дека безбедносната ситуација во Франција е влошена, пренесе новинската агенција ЧТК.

Слични предупредувања издадоа и Полска и Холандија, при што и двете земји им препорачаа на патниците да ги избегнуваат областите каде што се одвиваат протести.

Данска, Шведска, Финска и Норвешка, исто така, ги повикаа своите граѓани да ги избегнуваат демонстрациите и да се придржуваат до насоките на локалните власти. Предупредувања пристигнаа и од азиски земји. Според кинеските државни медиуми, Министерството за надворешни работи на Кина и кинеските дипломатски претставништва во Франција ги повикаа кинеските државјани да бидат претпазливи, да преземат дополнителни безбедносни мерки и да ги избегнуваат местата каде што се одржуваат протести.

Министерството за надворешни работи на Малезија соопшти дека ја следи ситуацијата; иако патувањата во Франција не се ограничени, Министерството им препорача на граѓаните да размислат за одложување на патувањата што не се неопходни, сè додека условите не се подобрат. Амбасадата на Малезија во Париз ги повика своите државјани кои веќе се во Франција да останат претпазливи и внимателни.

Бранот масовни протести во Франција започна кон средината на септември, првично како локален штрајк и бунт на ученици и наставници во средно училиште лоцирано во посиромашните предградија на Париз. Немирите беа предизвикани од лошите услови во образовниот систем, вклучително и хроничниот недостиг на наставници, пренатрупаните училници и дотраените училишни објекти.

Оттогаш, протестите се проширија во средните училишта и на универзитетите низ целата земја, проследени со масовни блокади и судири со полицијата.

На демонстрациите им се придружија синдикати, родители и активисти од поранешното движење „Жолти елеци“. Првичните барања за реформа во образованието се проширија преку големи улични протести против високите трошоци за живот, растот на цените на горивата и владините мерки за штедење. Воведени се полициски часови во делови од Лион и Ница.

Француските власти воведоа полициски часови во делови од Лион и Ница по немирите за време на масовните протести. Во Ница, мерката се однесува исклучиво на малолетници, пренесува BFM TV.