Мобилни патроли со камери почнаа со контрола на паркирањето во Штип

Почна со работа мобилна патрола за контрола на паркирањето во Штип. Од  ЈП „Стипион“, соопштија дека целта е подобрување на сообраќајниот ред и зголемување на безбедноста.

Општина Штип набави две возила и камери, кои ќе утврдуваат дали возачите имаат платено или немаат платено паркинг за своето возило во централното градско подрачје.

– Патролата ќе врши редовни контроли со посебен акцент на возила без регулирана наплата, неправилно паркирани возила. Со воведувањето на мобилната патрола се зголемува ефикасноста во контролата и се намалува човечкото влијание и целосно се отфрла можноста за непостапување – потенцираат од ЈП „Стипион“. 

Тие наведуваат дека наплатата може да се изврши на повеќе начини и тоа преку мобилна апликација или веб, преку СМС-порака, на постојните терминали за наплата во „тобако“ центрите во Штип.

– Во ограничен период на приспособување ќе се издаваат опомени за дел од прекршоците, по што ќе следува целосна имплементација на системот за наплата и санкционирање на неправилното паркирање – нагласуваат од претпријатието.

Притоа, апелираат до сите граѓани да ги почитуваат правилата за паркирање и сообраќајната сигнализација.

– Со одговорно однесување придонесуваме за побезбеден, поуреден и пофункционален град за сите – заклучија од ЈП „Стипион“. 

За зголемување на бројот на местата за паркинг, Општина Штип годинава планира изградба на нови катни гаражи и платформи на реката Отиња.