Лекарка од Британија е обвинета за повикување на поддршка за „Хамас“

Лекарка од Британската служба за јавно здравје (NHS) се појави пред „Олд Бејли“ во Лондон под обвинение за повикување на поддршка за Хамас. Меѓу пораките што ги објави на социјалните мрежи е и една на која пишува „ослободете го светот од еврејската супремација“. Станува збор за 31-годишната Рахме Аладван, која сè уште не се изјаснила за виновна, објави „Скај њуз“.

Аладван, која живее во Пилнинг, Јужен Глостершир, денес го потврди својот идентитет на суд. Таа е обвинета по шест точки. Четири од нив се однесуваат на повикување на поддршка за забранетата организација преку коментари објавени онлајн помеѓу јули и декември минатата година.

Британската Палестинка е обвинета и за поттикнување расна омраза со користење на заканувачки или навредлив јазик на протест во Вестминстер во јули и одделно преку пишан материјал во ноември.

На судот му се соопштени детали за пораките што таа наводно ги објавила на интернет, а кои биле истражени од страна на Тимот за јавен ред и мир на Метрополитенската полиција. Обвинителството тврди дека на 23 јули минатата година напишала: „Не го осудувам Хамас. Не го осудувам 7 октомври“ и „Го осудувам постоењето на Израел“.

Исто така, се тврди дека на 31 декември објавила: „Ослободете го светот од еврејската супремација“. На втората годишнина од нападите од 7 октомври, таа наводно објавила слика од булдожер со текст: „Слава на палестинскиот отпор“.

Аладван била уапсена во својот дом на 26 март и обвинета за шест прекршоци. Судијката Чима-Груб закажа судење за март следната година во Крунскиот суд во Бристол. Датумот на рочиштето за признавање на вината сè уште не е потврден, но прелиминарно е закажан за август оваа година.