„Ласт минит“ попусти во Грција, Хрватска и во Црна Гора

Почетокот на јули донесе високи цени и речиси целосно исполнети капацитети, а средината на месецот донесе поинаков тренд: намалување на цените за летување. За дел од дестинациите, сопствениците на апартмани и туристичките агенции почнаа со понуди дадени во последен момент, со цел да ги пополнат слободните датуми.

Најголем пад на цените во моментов се забележува во Грција, Хрватска и во Црна Гора, каде што туристите може да најдат сместување по значително пониски цени во споредба со почетокот на сезоната.

За северна Грција, особено за Халкидики, се појавуваат најатрактивните понуди. На местата како Неа Флогита, Неа Плагија и Пефкохори, апартманите што претходно се изнајмувале за 90 до 120 евра од ноќ, сега може да се најдат за 60 до 80 евра, зависно од периодот и од бројот на гости.

Има поповолни понуди и во Паралија, Олимпискиот Регион и на делови од Тасос, каде што туристите што не се ограничени со фиксни датуми може да направат значителна заштеда.

Намалување на цените има и на хрватското крајбрежје. Дел од приватното сместување во Далмација, Кварнер и на Истра се нуди за 10 до 50 проценти пониски цени, особено за гостите што може да пристигнат во наредните неколку дена.

Туристичките работници велат дека сопствениците често избираат да ги намалат цените наместо да останат апартманите празни во главниот дел од сезоната.

И на Црногорското Приморје има сè повеќе понуди во последен момент. За Будва, Бечиќи, Петровац и за Сутоморе се појавуваат промотивни цени за туристите што може веднаш да патуваат.

Според туристичките експерти, најголемите попусти најчесто се појавуваат седум-десет дена пред патувањето, кога проценуваат сопствениците дека нема да успеат да ги пополнат сите капацитети.

За туристите што немаат однапред фиксиран термин, втората половина на јули може да биде добра можност за поевтино летување, но најдобрите понуди обично се резервираат многу брзо.