Кој сака да си замине од Евролигата – дебело ќе плати!

Сè поголеми се тензиите меѓу Евролигата и НБА околу иднината на европската кошарка. Извршниот директор на Евролигата, Ќус Буено, предупреди дека евентуалното формирање конкурентно натпреварување од страна на НБА би можело да предизвика сериозни последици за кошаркарскиот пазар во Европа.

Иако преговорите не се одвиваат според очекувањата, Буено нагласи дека вратата за договор и понатаму е отворена. Сепак, тој смета дека создавањето паралелна лига би довело до поделба на клубовите и навивачите, со што би се намалила вредноста на постојното натпреварување.

• Ако одлучат да влезат на овој пазар, тоа ќе биде катастрофа. Тие го знаат тоа, ние го знаеме тоа, а секако не го ни сакаме тоа, изјави Буено, додавајќи дека секое потенцијално партнерство мора да биде прифатливо за Евролигата.

Една од главните причини поради кои не се очекува лесно да дојде до масовно заминување на клубовите е фактот што сите 13 акционери потпишаа десетгодишни договори во рамките на новиот стратешки план на натпреварувањето.

Буено предупреди дека евентуалното напуштање на Евролигата може да има сериозни финансиски последици. Според него, клубовите што би решиле да заминат би можеле да се соочат со договорни казни и барања за отштета, а потенцијалните загуби би можеле да надминат 80 милиони евра, колку што, според неговите зборови, моментално вредат нивните удели.

Во меѓувреме, Евролигата продолжува со плановите за трансформација во натпреварување засновано на франшизи. Предвидено е да бидат доделени осум постојани лиценци, а повеќе детали се очекуваат во ноември.

Иднината на европската кошарка сега зависи од тоа дали Евролигата и НБА ќе најдат заеднички јазик или ќе тргнат по различни патишта. Едно е јасно: евентуалната поделба би можела значително да го промени изгледот на кошарката на Стариот Континент.