Кочани ги собира младите таленти – нè чека уште една убава спортска приказна исполнета со детска насмевка

Градот Кочани утре ќе биде домаќин на големиот спортски настан „Денот на спортот“, кој се организира во рамките на Плазма спортските игри за млади. По Скопје, Куманово и Штип, спортскиот карван пристигнува и во градот што со години важи за еден од најголемите расадници на млади спортски таленти во Македонија.

Настанот ќе се одржи на стадионот „Никола Мантов“, со почеток во 10:30 часот. Во Кочани, младите спортисти ќе имаат можност да се натпреваруваат во повеќе дисциплини, меѓу кои мал фудбал, пинг-понг, тенис, народна топка и атлетика во рамките на „Денот на спортот“, како и баскет 3×3, ракомет, шах, одбојка и одбојка на песок.

Плазма спортските игри за млади се една од најголемите аматерски спортски манифестации во Европа, со традиција подолга од 30 години, а оваа година првпат се одржуваат и во Македонија. Целта е, преку спортот, на децата и на младите да им се понуди можност бесплатно да се вклучат во активности, да се дружат, да развиваат здрави навики и да ги негуваат вистинските спортски вредности.

На отворањето ќе присуствуваат претседателката на Федерацијата на училиштен спорт на Македонија, Елена Мицковска, и градоначалникот на Кочани, Владко Грозданов, како и повеќе познати спортски имиња.

Главната цел на Спортските игри за млади е бесплатен спорт за секое дете, како и поттикнување здрав, активен и динамичен животен стил, промоција на инклузијата, развој на здрави навики, негување на ферплејот, создавање искрени пријателства и градење вистински вредности.

По успешните настани во Скопје, Куманово и во Штип, се очекува и Кочани да понуди вистински спортски спектакл и уште една убава спортска приказна исполнета со детска насмевка, натпреварувачки дух и со ферплеј.