ИСПОЛНЕТИ ОБРСКИТЕ ШТО ГИ БАРАШЕ БРИСЕЛ: ЕУ одобри 65,7 милиони евра од Планот за раст за Македонија

Македонија доби 65,7 милиони евра од Европската Унија во рамките на Планот за раст на Западен Балкан, соопшти вчера Европската комисија. Освен за Македонија, Европската комисија стави на располагање 49 милиони евра за Албанија и 44,2 милиони евра за Црна Гора. Србија и Босна и Херцеговина не се меѓу земјите кои ќе добијат од европските пари во рамките на Програмата за реформи и пораст.

Ова следува по третото барање за исплата и позитивната оценка на Комисијата за реформските чекори спроведени во областите на деловната конкурентност и иновации во Албанија и Црна Гора, како и образованието и дигитализацијата во Македонија. Со денешното објавување, вкупниот износ ослободен во рамките на Програмата во рамките на нивните соодветни пликови достигнува 212,8 милиони евра за Албанија, 89,3 милиони евра за Црна Гора и 142,1 милиони евра за Македонија.

–Во Северна Македонија, оценетите реформи вклучуваат мерки за подобрување на финансирањето на основното и средното образование и мерки со цел проширување на пристапот до дигитална инфраструктура и ИТ-опрема во училиштата. Од исплатени 65,7 милиони евра, 30,6 милиони евра ќе бидат префрлени во државниот буџет, додека останатите средства се достапни за инвестициски проекти преку ВБИФ. Средствата што се наменети за WBIF, откако ќе бидат одобрени од одборот на WBIF, ќе поддржат инфраструктурни проекти во одржливиот транспорт, чистата енергија, дигиталниот и човечкиот капитал. Проектите ќе се спроведуваат во тесна соработка со партнерите од Западен Балкан и меѓународните финансиски институции – се наведува во соопштението на ЕК.

Во соопштението се потсетува дека Планот за раст на Западен Балкан, усвоен во 2023 година, има за цел да ги донесе придобивките од членството на земјите партнери во регионот дури и пред нивното пристапување кон ЕУ.

–Планот се стреми да ги интегрира партнерите во единствениот пазар на ЕУ, да ја подобри регионалната економска соработка, да ги продлабочи реформите поврзани со ЕУ и да го зголеми претпристапното финансирање. Ова, пак, го забрзува процесот на проширување и порастот на партнерските економии – потсети Брисел.

И македонскиот министер за надворешни работи, Тимчо Муцунски, денеска на социјалните мрежи ја објави веста за исплатените средства.

–Ова е потврда за посветеноста на Владата кон реформите и исполнувањето на обврските од Планот за раст, како и признание за институционалниот капацитет на државата. Средствата се одобрени по позитивната оценка на Европската комисија за спроведените реформски чекори, кои во македонскиот случај се однесуваат на мерки во образованието и дигитализацијата. Од вкупната сума, 30,6 милиони евра ќе бидат префрлени директно во државниот буџет, додека останатите средства се наменети за инвестициски проекти преку Инвестициската рамка за Западен Балкан – објасни Муцунски.

Европската комисија ги распределува средствата од овој План за раст поединечно на секоја земја и само кога таа ги исполнува специфичните услови утврдени во нејзината „Реформска агенда“, документ во кој се наведени точните реформи на кои се обврзала земјата. Планот е поддржан од Фондот за реформи и пораст, неговиот финансиски инструмент, со пакет од 6 милијарди евра. На секои шест месеци, партнерите известуваат за нивниот напредок во реформите спроведени со поддршка на Фондот. Најновото финансиско соопштение се однесува на третиот полугодишен период на известување, опфаќајќи ги реформите спроведени до крајот на декември 2025 година. Вкупното финансирање ослободено во рамките на овој инструмент од 2024 година изнесува 673,6 милиони евра. (Б. Ѓ.)