Хари и Меган загрижени: Двајца мажи се врткале околу училиштето каде што учат нивните деца – интервенираше полицијата

Војводата и војвотката од Сасекс, принцот Хари и Меган Маркл, го осудија „крајно непромисленото“ однесување – како што самите го опишаа – на еден странски фотограф забележан во близина на училиштето што го посетуваат нивните деца, принцот Арчи и принцезата Лилибет.

Двајца мажи со ранци беа забележани како ја набљудуваат околината на училиштето и застануваат на неколку места за да погледнат во училишниот двор, пред да се вратат во комбе, за кое полицијата подоцна утврди дека било изнајмено.

Еден од мажите подоцна бил идентификуван како меѓународен фотограф кој работи за истакната европска новинска агенција, пренесува Би-Би-Си.

Портпаролот на Хари и Меган Маркл го опиша таквото однесување во близина на училиштето како „неприфатливо нарушување на приватноста на децата“.

„Постои огромна разлика помеѓу легитимната работа на медиумите и фотографите кои го набљудуваат училиштето, застануваат за да ѕирнат во игралиштето и ги следат децата додека ги извршуваат своите секојдневни активности. Одлуката на фотографот да се однесува на овој начин во близина на училиштето е крајно непромислена“, изјави портпаролот.

Тој додаде дека е загрижувачки што некои европски папараци не ја почитуваат приватноста на децата додека се на училиште, особено со оглед на тоа што инцидентот се случи кратко по друг безбедносен инцидент во близина на воената база „РАФ Ферфорд“.

Децата префрлени во друго училиште
Пред неколку недели, Хари и Меган ги префрлија своите деца од претходното училиште, откако тие таму посетувале настава само две недели. Како причини ги наведоа густиот сообраќај при носењето на децата на училиште, долгото патување и дополнителниот притисок врз нивниот тим за безбедност.

Се случи и инцидент при кој беше попречено движењето на колоната возила во која се наоѓаше семејството.

Двојката неодамна се врати во Обединетото Кралство по неколкугодишен престој во Калифорнија, што уследи по одлуката на Хари од 2020 година да се повлече од должностите како активен член на кралското семејство.

Не се знае каде живеат
Не е познато каде точно во Обединетото Кралство се населиле Хари и Меган, иако Меган на социјалните мрежи објавуваше снимки од нивниот семеен живот на село.

Во исто време, сè уште не е донесена одлука дали на двојката ќе ѝ биде доделена полициска заштита финансирана од парите на даночните обврзници. Нивото на заштита треба да го одреди Извршниот комитет за заштита на кралското семејство и јавните личности (RAVEC).

При проценката ќе се земат предвид ризиците со кои се соочува семејството во својот нов дом, како и нивното вообичаено движење, вклучувајќи ги патувањата и носењето на децата на училиште. Однесувањето на фотографите што работат за британски медиуми или агенции генерално е регулирано со правилата на телата за надзор на печатот IPSO и IMPRESS, додека фотографите од други земји не се обврзани да ги почитуваат овие правила, освен во случаи кога нивното однесување претставува кршење на законот.