Германската влада планира да ја преполови квотата за работни дозволи за граѓаните од земјите од Западен Балкан, која моментално изнесува 50.000 годишно. Националната агенција за вработување предупредува дека ова е погрешен потег.
Повеќе од еден милион луѓе од регионот моментално се вработени во Германија и уплаќаат целосни придонеси за социјално осигурување, истакна Ванеса Ахуџа, член на извршниот одбор на Агенцијата, пренесува dpa.
Таа нагласи дека бројот на работници од Србија, Косово, Босна и Херцеговина, Црна Гора, Северна Македонија и Албанија, на кои им е дозволено да имигрираат заради вработување, не треба да се намалува.
Повеќе од половина – поточно 53 отсто – од имигрантите од регионот се вработени како квалификувани или висококвалификувани работници, а точно половина работат на позиции за кои на германскиот пазар нема доволно работна сила.
„Намалувањето на квотата ќе го ослаби успешниот модел на имиграција, ќе го влоши недостигот од квалификувана работна сила и ќе им отежне на компаниите да најдат соодветни работници“, изјави Ахуџа.
Таа додаде дека успехот на „државните инвестиции – кои делуваат како ’турбо-мотор‘ за градежната индустрија“ – исто така зависи од достапноста на соодветна работна сила.
Владата најави дека, почнувајќи од јануари, квотата за работни дозволи за Западен Балкан ќе биде намалена на 25.000. Згора на тоа, дури и квота двојно поголема од оваа би се потрошила пред крајот на 2025, како и на 2026 година.
Во 2016 година, Германија воведе посебна квота од 50.000 работни дозволи за имигранти од Западен Балкан. Овој регион беше дефиниран од страна на ЕУ, која ги групираше земјите-кандидати за членство.
За апликантите кои бараат работна виза во рамките на оваа квота, постапката за имиграција е поедноставена за кандидати од сите професионални профили.
