Најмалку 59 Палестинци беа убиени, а повеќе од 200 ранети во вторник наутро додека чекаа камион со храна да пристигне во јужниот дел на Појасот Газа, соопшти Министерството за здравство на Газа, како што објави „Радио Слободна Европа“, пренесе „Ал-Џезира“.
Инцидентот се случил во градот Кан Јунис, каде што луѓето чекале конвои на ОН и комерцијални конвои кои носеле хуманитарна помош.
Според очевидци, израелските сили прво извршиле воздушен напад врз блиска куќа, а потоа отвориле оган врз толпата. Сведокот Јусуф Нофал рече дека видел многу луѓе како лежат неподвижни и крварат.
„Тоа беше масовно убиство. Тие пукаа дури и додека луѓето бегаа“, рече тој.
Телата на мртвите и ранетите беа однесени во болницата Насер во Кан Јунис, каде што беше потврден бројот на жртви.
Локалните власти ја обвинија израелската војска дека со недели отворала оган врз гладни цивили кои се обидувале да стигнат до точките за дистрибуција на храна управувани од Хуманитарната фондација Газа (GHF), приватен изведувач поддржан од САД и Израел.
Тел Авив вели дека новата дистрибутивна мрежа има за цел да спречи помошта да стигне до Хамас, но ОН и агенциите за помош ги отфрлија тврдењата, предупредувајќи дека системот ги крши основните хуманитарни принципи.
Израелската војска сè уште не го коментираше најновиот напад, иако претходно призна дека понекогаш испукува „предупредувачки истрели“ кога цивилите се приближуваат премногу до воените сили.
Агенциите на ОН предупредија за глад во Газа, дом на околу два милиони луѓе. Мрежата за помош управувана од ОН сè уште се обидува да достави помош, но се соочува со сериозни предизвици: воени блокади, грабежи и целосно нарушување на јавниот ред.
Од почетокот на израелската воена кампања во октомври 2023 година, повеќе од 55.300 Палестинци се убиени, повеќе од половина од нив жени и деца, според Министерството за здравство на Газа.
Израел ја започна офанзивата по нападот на Хамас на 7 октомври во кој загинаа околу 1.200 луѓе, а 251 беа киднапирани. Според израелските бројки, 53 заложници сè уште се држат во Газа.
