Европа размислува да пушти во оптек 50 милиони барели дизел од резервите по притисокот од САД?

Земјите од Европската Унија во петокот разговараа за францускиот предлог европските земји да ослободат 50 милиони барели дизел од залихите, по притисокот од САД да ги зголемат залихите за да го ублажат наглиот пораст на цените на горивата.

Според извор запознаен со разговорите, предлогот на Франција предвидува европските земји да ослободат 50 милиони барели дизел, додека членовите на Меѓународната агенција за енергија (ИЕА) истовремено би ослободиле 50 милиони барели сурова нафта на пазарот, објавува Ројтерс.

Европските земји, исто така, разговараа за фактот дека евентуалниот договор за дополнително ослободување на залихите на дизел треба да биде придружен со обврската на Вашингтон да не го забранува еднострано извозот на американски дизел.

Разговорите доаѓаат откако администрацијата на американскиот претседател Доналд Трамп побара од Германија и Франција да ги искористат своите итни залихи на дизел за да помогнат во намалувањето на високите цени на горивата на светскиот пазар.

Вашингтон, според извори запознаени со разговорите, предупреди дека во спротивно може да размисли за забрана на извозот на американски дизел.

Франција и Германија се особено важни во евентуалниот европски одговор бидејќи заедно имаат повеќе од една третина од стратешките резерви на дизел во Европската Унија.

Лидерите на земјите од Групата седум (Г7) би можеле да одржат дискусија за следните чекори во петок попладне.

Веќе во март оваа година, по нарушувањата на енергетските пазари предизвикани од конфликтот на Блискиот Исток, членовите на ИЕА се согласија за најголемото координирано ослободување на резерви во историјата на Агенцијата – вкупно 400 милиони барели нафта.