Ердоган: Договорот од Мека не е насочен против ниту една држава; отворен e и за пријателски земји

Турскиот претседател Реџеп Таип Ердоган изјави дека Договорот за заедничка одбрана, потпишан во петокот од страна на Турција, Саудиска Арабија и Пакистан, не е насочен против ниту една конкретна држава и останува отворен за учество на други пријателски нации кои се стремат кон мир, просперитет и стабилност во регионот.

Во објава на турската социјална платформа „NSosyal“, Ердоган рече дека договорот – заснован на принципот на колективно одвраќање – ќе ја зајакне соработката во областа на безбедноста и одбраната, ќе ги поддржи заедничките проекти во одбранбената индустрија и ќе придонесе кон напорите за борба против тероризмот, пренесува агенцијата Анадолија.

Тој истакна дека договорот исто така го потврдува правото на самоодбрана, како што е дефинирано во Членот 51 од Повелбата на Обединетите нации.

„Договорот не е насочен против ниту една држава и е отворен за учество на сите братски нации кои се стремат кон мир, просперитет и стабилност во нашиот регион“, рече Ердоган.

Тој додаде дека Турција одлучно ќе го задржи својот принципиелен став за решавање на конфликтите и кризите преку дијалог и дипломатија, заснован на почитување на меѓународното право и усогласен со визијата за регионална сопственост.

Ердоган изјави дека во петокот отпатувал во Мека на покана на саудискиот престолонаследник и премиер Мохамед бин Салман, каде што се сретнал со саудискиот престолонаследник и со пакистанскиот премиер Шехбаз Шариф.

„При таа пригода, тројцата го потпишавме Договорот за заедничка одбрана“, рече Ердоган.

Ердоган изрази надеж дека посетата, консултациите и договорот ќе донесат придобивки за целиот регион.