Еден од шест Германци го откажува или го одложува патувањето поради војна, глобалната криза и политичката неизвесност

Многу Германци ги менуваат своите планови за патување за Велигден и наредните месеци поради војна, криза и политичка неизвесност, според анкета спроведена за туристичкиот сектор објавена во саботата.

Студијата на Германскиот институт за туристички истражувања покажа дека 16 проценти од 1.124 испитаници анкетирани помеѓу 25 и 30 март ги промениле своите планови за следните три месеци поради глобалната политичка ситуација.

Од оние кои ги промениле своите планови, 46 проценти одлучиле да не патуваат, а 32 проценти веќе го откажале своето патување.

„Одењето на одмор не е неполитичка работа“, рече Јулијан Рајф, директор на институтот, додавајќи дека политичките услови на дестинацијата се главна компонента на одлуките за одмор.

Две третини од испитаниците сметаат дека политичката ситуација во нивната дестинација е важна или многу важна, а 79 проценти рекле дека би ги избегнувале дестинациите со политичка нестабилност или социјални немири.

Рајнхард Мајер, раководител на Германскиот туристички одбор, рече дека моменталната политичка ситуација во светот очигледно има влијание врз плановите за патување, барем на краток рок. „Нашето истражување јасно ја покажува неизвесноста што преовладува кај германските туристи поради глобалната криза и зголемувањето на цените што произлегуваат од тоа“, рече тој.

И покрај ова, 72 проценти од Германците планираат да патуваат на одмор, или во земјата или во странство, помеѓу април и јуни, при што Баварија е популарна домашна дестинација. Шпанија и Италија го водат патот за меѓународно патување, пренесе „Хина“.