Драма во Црното Море: Брод погоден од дрон, осум морнари се водат за исчезнати

Утринава, морнари на брод што плови под знамето на Сан Марино, лоциран во близина на романското пристаниште Сулина во Црното Море, побараа помош од романските власти, пријавувајќи дека на бродот избувнал пожар. Во меѓувреме, морнари од околните пловни објекти изјавија дека виделе како бродот е погоден од два дрона.

Претставници на романската Агенција за спасување на море (ARSVOM) изјавија дека бродот на кој му е потребна помош се наоѓа на 14 наутички милји од Сулина, според информативниот портал Digi24.

Причината за пожарот сè уште не е официјално позната, но сепак, во текот на ноќта во областа било издадено предупредување откако во 1:34 часот по полноќ бил детектиран дрон. Дронот потоа исчезнал од радарот над романските територијални води – сличен случај со оној што се случил претходната вечер, кратко по 20 часот.

Според првичните информации, на бродот имало 12 морнари, од кои осуммина во моментов се водат како исчезнати.

Романските спасувачки тимови спроведуваат операција во која се вклучени и пловен објект и хеликоптер.

Романски воздухоплови биле кренати во воздух во текот на ноќта откако воените радари детектирале дронови во близина на Сулина и во околината на Змискиот остров (Островот Серпилор).