Дете од четири години заработило 3,1 милион денари од дивиденда, а највисоката месечна плата била 190 илјади евра

Дете на возраст од четири години во 2025 година остварило доход од 3,1 милион денари од дивиденда, додека 97-годишен пензионер пријавил 1,089 милиони денари, од кои 59 отсто биле од пензија, а остатокот од дивиденда, покажуваат податоците на Управата за јавни приходи (УЈП).

Според директорката на УЈП, Елена Петрова, минатата година биле поднесени над 863.100 годишни даночни пријави, што е за околу 83.000, односно 10,6 отсто повеќе во споредба со 2024 година. Најголем дел од пријавите биле поднесени во Скопје, по што следуваат Штип, Прилеп, Битола, Тетово и Струмица. Истовремено, утврдениот бруто-приход се зголемил за 74,1 милијарда денари, односно за 13,8 отсто, додека утврдениот данок на личен доход пораснал за 4,9 милијарди денари или за 13,9 отсто.

Податоците откриваат и високи поединечни доходи од различни извори. Највисоката годишна бруто-плата изнесувала 139,1 милион денари, највисоката дивиденда достигнала 252,6 милиони денари, а највисоката капитална добивка изнесувала 164,2 милиони денари. Највисокиот доход од самостојна дејност бил 157,9 милиони денари. Најголемиот вкупен доход од сите извори, во износ од 257,5 милиони денари, го остварил жител на Гевгелија преку плата, дивиденда и друг доход исплатен од една компанија. Следува жител на Охрид со 254,4 милиони денари.

Највисоката месечна бруто-плата исплатена во земјава во 2025 година изнесувала нешто помалку од 190.000 евра, односно над 2,2 милиони евра годишно. Платата била исплатена во секторот за вадење камен јаглен и била за околу два отсто повисока од највисоката плата во претходната година. Сите пет највисоки годишни бруто-плати надминале два милиони евра и биле исплатени во Скопје, во секторите како фармацијата, трговијата со тутун, храна и пијалаци, во болничката дејност и во трговијата со фармацевтски производи.

Меѓу највисоките приходи надвор од плата, жител на Скопје пријавил нешто помалку од два милиони евра бруто на годишно ниво. Од петте највисоки вакви приходи, уште три надминале еден милион евра, додека еден изнесувал 42 милиони денари. Највисок приход од дивиденда пријавил жител на Гевгелија, кој добил над четири милиони евра, а сличен износ пријавил и жител на Охрид.

– Овие приходи покажуваат зошто е важно да се разгледуваат различните извори на доход заедно, а не изолирано – истакна Петрова.