Дали ќе плаќаат транспортните компании за туѓи грешки?

Логистичкиот сектор во Европската Унија бара јасни правила за одговорноста на транспортните и на шпедитерските компании во случаи на царински измами, при кои неплатените давачки може да достигнат стотици милиони евра. Ова го објавија од „Камионџии Балкан“, посочувајќи дека сè поголем проблем претставува прашањето кој треба да ја преземе финансиската одговорност кога не ги исполнуваат увозниците своите царински обврски.

Според објавата, во фокусот се пратките од Кина кон Европската Унија, кај кои одредени увозници наводно пријавувале стока под несоодветни царински тарифни ознаки со цел да избегнат дел од увозните давачки. Како пример се наведуваат електрични велосипеди пријавувани како фитнес-опрема, со што, наводно, се избегнувале антидампинг-царини.

Проблемот се продлабочува кога стануваат увозниците несолвентни или не може да бидат пронајдени. Во такви случаи, царинските органи може да бараат наплата и од други учесници во синџирот на снабдување, зависно од нивната улога и од важечките законски правила. На удар може да се најдат повеќе категории компании, меѓу кои шпедитерите, железничките оператори, царинските застапници, компаниите што организираат транзит и операторите на магацини за привремено складирање. Потенцијалните побарувања може да опфатат неплатени царини, ДДВ, антидампинг-давачки и камати.

Од логистичкиот сектор предупредуваат дека транспортните компании не секогаш имаат можност да ја проверат целата стока во пломбираните контејнери, ниту самостојно да утврдат дали правилно ја декларирал увозникот. Поради тоа, сметаат дека не треба автоматски да сносат финансиски последици за измами во кои не учествувале и кои не можеле разумно да ги откријат.

Организациите CLECAT, FIATA, CER и UIRR побарале од Европската комисија да ги разјасни правилата за царинска одговорност и да обезбеди поголема правна сигурност за компаниите што работат во меѓународната логистика.