Албанскиот министер за внатрешни работи, Ервин Демо, денеска изјави дека границата на толеранција е премината за време на протестите во Тирана, истакнувајќи дека властите нема да дозволат насилство. Оваа изјава доаѓа еден ден откако демонстрациите беа одбележани со низа инциденти.
„Црвената линија е премината, ова веќе не е протест. Владата е отворена за дијалог, но нема да толерира насилство“, предупреди Демо за време на состанокот со раководството на албанската полиција, со кој претседаваше премиерот Еди Рама, пренесува Albanian Post.
Како еден од клучните инциденти, Демо го издвои нападот на демонстрантите врз Полициската станица бр. 3. Неколку полициски службеници се здобиле со повреди додека се обидувале да го заштитат објектот.
„Полициската станица бр. 3 беше нападната од демонстранти. Припадниците кои ја бранеа полициската зграда се здобија со повреди. Ова покажува дека нивото на насилство за време на протестот достигна точка каде што тој веќе не може да се смета за протест“, рече Демо.
Министерот дополнително наведе дека, според неговата проценка, насилните учесници во протестот нашле засолниште во седиштето на еден политички субјект – факт што тој го посочи како можен извор на нивната мотивација. Во однос на улогата на полицијата, Демо нагласи дека службениците треба да добијат целосна поддршка во одржувањето на јавниот ред и мир, како и во заштитата на правото на граѓаните да протестираат.
„Вие сте тие што треба да добијат максимална поддршка, бидејќи го гарантирате правото на протест. Улогата на полицијата во заштитата на правата на граѓаните никогаш не била доведена во прашање“, рече тој.
Демо повтори дека насилството е неприфатливо во едно демократско општество, нагласувајќи дека албанската влада и премиерот Еди Рама се отворени за дијалог, но нема да толерираат насилни дејствија. Протестите во Албанија траат веќе седум дена, а ги предводат студенти незадоволни од состојбата во образовниот систем, високите трошоци за студирање и ограничените можности за вработување на младите. Во меѓувреме, овие собири прераснаа во пошироки демонстрации против владата на Еди Рама, со барања за негова оставка.
