Иранскиот министер за надворешни работи, Абас Арагчи, денеска изјави дека предлогот на Техеран за седумдневен план за повторно отворање на Ормускиот теснец останува на маса, пренесе иранската државна новинска агенција ИРНА.
Во интервју за ИРНА, на маргините на 52-рата седница на Советот на министри за надворешни работи на Организацијата за исламска соработка во Багдад, Арагчи рече дека условите на Иран за прекин на непријателствата и повторно отворање на теснецот се „целосно јасни“ и му биле претставени на САД како дел од седумдневниот план.
Вашингтон ги изнесе своите ставови за планот, кои Техеран во моментов ги разгледува, додаде Арагчи.
„Планот на Иран останува на маса. Доколку се исполнат тие услови, Ормускиот теснец ќе биде повторно отворен шестиот ден, а преговорите ќе продолжат седмиот ден“, рече Арагчи.
Тој истакна дека условите на Иран не се ниту исклучителни, ниту необични; напротив, тие претставуваат исти обврски на кои САД веќе се согласиле во Меморандумот за разбирање за мир, како и за време на други преговори.
Арагчи нагласи дека Иран нема да попушти пред заканите и е подготвен да се брани, но истовремено останува отворен за дипломатија.
На 28 февруари, Израел и САД започнаа заеднички напади врз Техеран и други ирански градови. Иран одговори со серија напади со ракети и беспилотни летала врз Израел и врз американските бази и објекти во регионот, истовремено засилувајќи ја контролата врз Ормускиот теснец.
На 8 април беше постигнат прекин на огнот меѓу завојуваните страни, а на 18 јуни Иран и САД потпишаа Меморандум за разбирање за ставање крај на војната во регионот на сите фронтови.
Според овој документ, двете земји требаше во рок од 60 дена – до 17 август – да одржат преговори со цел постигнување конечен договор во врска со иранската нуклеарна програма и укинувањето на санкциите. Сепак, тие не успеаја да постигнат доволен напредок кон таков договор.
