АНБ се екипира со најдобрите дипломирани студенти

Агенцијата за национална безбедност, годинава, се екипирала со најдобрите студенти од Факултетот за безбедност, информираат оттаму и додаваат дека секогаш се отворени за практична обука и за кариерно напредување на млади и амбициозни кадри.

– Оваа година, врз основа на податоци од Факултетот за безбедност, најдобрите дипломирани студенти веќе се вработени во Агенцијата за национална безбедност. Ова претставува конкретен и значаен исчекор што ја потврдува суштинската поврзаност помеѓу образовниот систем и безбедносните институции. Ќе продолжиме да ја унапредуваме оваа практика и во иднина, со јасна определба да се препознава и да се поддржува квалитетот, на младите да им се отвораат можности и да се гради силен, професионален и кредибилен безбедносен систем, велат од АНБ.

Предизвиците на современиот безбедносен систем, додаваат, не се нешто што може да се совлада само преку теоретско знаење – тие претставуваат динамична реалност што бара подготвени, одговорни и високо мотивирани професионалци.

– Токму затоа, целта на предавањата е на студентите да им се доближат реалните аспекти на безбедносната професија, да се поттикне критичко размислување и да се изгради свест за одговорноста што ја носи оваа професија. Воедно, овие средби имаат за цел да ги мотивираат младите да се насочат кон кариера во која знаењето, интегритетот и посветеноста имаат вистинска вредност, велат од Агенцијата.