Аларм во Полска: Неидентификуван објект навлегол во воздушниот простор, итно се испраќаат тимови на локацијата на евентуален пад

Полската војска денеска соопшти дека еден неидентификуван објект можеби навлегол во воздушниот простор на земјата, поради што е испратен копнен тим за пребарување и спасување за да ја лоцира евентуалната местоположба на пад.

„По сомнение за нарушување на воздушниот простор на Република Полска од страна на неидентификуван објект – инцидент што можеби се случил синоќа – преземени се мерки за проверка на настанот“, објави Оперативната команда на полските вооружени сили (DORSZ) на социјалната мрежа „Икс“.

Според извештаите, копнен тим за пребарување и спасување од Силите за територијална одбрана е испратен јужно од Лублин за да го пребара теренот во потрага по евентуално место на пад. Во операцијата учествуваат и полицијата и воената жандармерија.

„Целта на овие активности е да се провери регистрираниот радарски сигнал и извештаите од локалните жители, како и да се утврди природата на потенцијалниот објект – конкретно, дали сигналот можеби е резултат на метеоролошки појави или аномалии“, се додава во соопштението.

Од DORSZ наведуваат дека, во оваа фаза, нарушувањето на полскиот воздушен простор сè уште не е потврдено.

Оперативната команда на полските вооружени сили изјави дека ја следи ситуацијата и ќе обезбеди дополнителни информации откако ќе заврши истрагата и ќе се потврдат деталите за инцидентот, пренесе „Танјуг“.